ضروري تنتهي الرحلة.. ضروري تنشف اليدين
ضروري دام مركبنا.. غرق بكفوفنا العرقا
من العام الحزين أمشي على متني حملت اثنين
هواك وإنت يا خل.. وقطعت الدرب من شرقا
ركبت البحر وأمواجه.. تمايل بي على الصوبين
أجدف مدري لللقيا.. أو إن الشاطي الفرقا
من أول ما بدينا الدرب.. وإنت مغمض العينين
كفيتك هم هالرحلة.. مطر والبرد.. والبرقا
ووصلت بلا مجاديفي.. بلا عزم.. وبلا حرفين
رماني البحر وأشواقي.. على صخر الندم شرقا
تلفت صاحبي أرجوك.. شف خطوات هالرجلين
تعرف اللي مشى لأجلك.. مجاديفه طفت غرقا
ضروري اليوم أكمّل لك.. نهاية حبنا المسكين
وناظر جثته يمكن.. من أعماق البحر ترقا
تخيل من وصلت الشط.. تثاوب ظلم وعزم سنين
فغر فاه ولفظ حبك.. وبلع شهقاته الزرقا
وأنا يا سيدي أزعجتك.. ولكن الفراق الحين
أبيك تفوق للمشهد.. خفوقي والهوى احترقا
وأنا والحب نتوادع.. يصفق من بعيد البين
ويكتب بآخر الرحلة.. على الإخلاص افترقا